Зборнік уключаны Вышэйшай атэстацыйнай камісіяй Рэспублікі Беларусь у пералік навуковых выданняў для апублікавання вынікаў дысертацыйных даследаванняў па юрыдычных навуках. Усе артыкулы зборніка занесены ў расійскі індэкс навуковага цытавання.Зборнік выдадзены з мэтай азнаямлення навуковай грамадскасці, навучальных устаноў, праваахоўных і судовых органаў з вынікамі даследаванняў найбольш актуальных праблем сучаснага грамадзянскага і прадпрымальніцкага права, грамадзянскага і гаспадарчага працэсаў, сямейнага і жыллёвага права.
У юбілейным выпуску 2025 года знаходзіцца 65 артыкулаў, аўтарамі якіх з'яўляюцца: 19 дактароў і 32 кандыдаты юрыдычных навук, 8 дактарантаў, аспірантаў і суіскальнікаў, а таксама 5 суддзяў, 3 судовыя эксперты, пракурорскія работнікі, медыятары, кансультанты міністэрстваў і ведамстваў, іншыя кансультанты.
Зборнік навуковых артыкулаў «Праблемы грамадзянскага права і працэсу» з'яўляецца вядучым у Рэспубліцы Беларусь навуковым выданнем у сваім сегменце. На яго старонках абмяркоўваюцца актуальныя праблемы юрыдычнай навукі, звязаныя з развіццём грамадзянскай юрысдыкцыі, цывілістычнага працэсу, дзяржаўна-прыватнага партнёрства, грамадзянска-прававой абароны гісторыка-культурнай спадчыны і навакольнага прыроднага асяроддзя, стварэннем інстытуцыйнага асяроддзя для развіцця рыначнай эканомікі, фарміраваннем адзінай эканамічнай прасторы ЕАЭС, развіццём лічбавага права.
Галоўным рэдактарам з'яўляецца доктар юрыдычных навук, прафесар Ігар Мартыненка, які запрашае аўтараў прадставіць свае новыя арыгінальныя артыкулы ў 11-й выпуск да 10 жніўня 2026 года.