З 12 па 14 сакавіка на факультэце біялогіі і экалогіі Купалаўскага ўніверсітэта прайшоў навукова-практычны семінар «Метадалогія даследаванняў жывёл». У рамках мерапрыемства вучоныя НАН Беларусі падзяліліся са студэнтамі інфармацыяй аб актуальных метадах даследавання ў сваёй сферы.Ключавымі спікерамі мерапрыемства выступілі спецыялісты НАН Беларусі ў галіне іхтыялогіі: загадчык лабараторыі іхтыялогіі ДНВА "НПЦ НАН Беларусі па біярэсурсах", кандыдат біялагічных навук, дацэнт Алена Гайдучэнка і аспірант лабараторыі іхтыялогіі, выпускніца факультэта біялогіі і экалогіі ГрДУ імя Янкі Купалы Анастасія Сасна.
Спецыялісты правялі для студэнтаў 2-4 курсы лекцыі і майстар-класы па сучасных малекулярна-генетычных метадах іхтыялагічных даследаванняў.
Візіт прадстаўнікоў Нацыянальнай акадэміі навук Беларусі не абмежаваўся працай са студэнтамі. Таксама ў рамках візіту прадстаўнікі факультэта біялогіі і экалогіі і лабараторыі іхтыялогіі ДНВА "НПЦ НАН Беларусі па біярэсурсах" вызначылі вектары супрацоўніцтва - правядзенне сумесных навуковых работ і публікацыі ў высокарэйтынгавых часопісах.
Дадзеная сустрэча не толькі дазволіла студэнтам атрымаць новыя веды, але і пашырыла гарызонты супрацоўніцтва Купалаўскага ўніверсітэта.
