16 чэрвеня ў Мінску прайшло маштабнае міжнароднае мерапрыемства – дзесятая нарада Міністраў адукацыі дзяржаў-членаў ШАС. Форум адбыўся пад старшынствам Міністра адукацыі Рэспублікі Беларусь Андрэя Іванца. У межах сустрэчы прайшла канферэнцыя Універсітэта ШАС, актыўным удзельнікам якой стала дэлегацыя Гродзенскага дзяржаўнага ўніверсітэта імя Янкі Купалы на чале з рэктарам Ірынай Кітурка.Удзельнікамі форуму сталі больш за 30 прадстаўнікоў дзяржаў-членаў ШАС, сярод якіх Міністры адукацыі і іх намеснікі, рэктары ўніверсітэтаў і супрацоўнікі профільных структур.
Купалаўскі ўніверсітэт на мерапрыемстве разам з Ірынай Фёдараўнай прадставілі дэкан педагагічнага факультэта Юрый Гняздоўскі, дэкан факультэта біялогіі і экалогіі Вольга Янчурэвіч, дэкан факультэта матэматыкі і інфарматыкі Андрэй Праневіч, начальнік аддзела міжнароднага супрацоўніцтва Вольга Мінава і намеснік дэкана па ідэалагічнай і выхаваўчай рабоце факультэта мастацтваў і дызайну Наталля Дораш.
Падчас канферэнцый Універсітэта ШАС дэлегаты абмеркавалі міжнароднае супрацоўніцтва ў сферы адукацыі. Ключавымі тэмамі сталі навукова-тэхнічнае і інавацыйнае ўзаемадзеянне па прыярытэтных напрамках. Асаблівую ўвагу ўдзельнікі ўдзялілі развіццю сумесных навуковых даследаванняў і рэалізацыі праектаў, якія ўяўляюць узаемную цікавасць і садзейнічаюць развіццю сферы адукацыі.
