Новы навучальны дапаможнік распрацаваны ў адпаведнасці з новай вучэбнай праграмай курса «Оптыка» і мае грыф Міністэрства адукацыі Рэспублікі Беларусь. Выданне ўяўляе сабой паглыбленае даследаванне ўласцівасцей электрамагнітных хваляў і ізатропных асяроддзяў. Аўтар навучальнага дапаможніка – загадчык кафедры агульнай фізікі, доктар фізіка-матэматычных навук, прафесар Аляксандр Маскевіч.У выданні падрабязна разглядаюцца асаблівасці неаднародных хваль і дэталёва аналізуюцца фізічныя прынцыпы працы лазераў і ўласцівасці лазернага выпраменьвання. Адмысловая ўвага нададзена практычнаму выкарыстанню аптычных прыбораў і шляхам падвышэння іх адрознівальнай здольнасці.
Навучальны дапаможнік, выпушчаны тыражом у 200 экзэмпляраў, арыентаваны ў першую чаргу на студэнтаў фізічных спецыяльнасцей універсітэтаў. Аднак, дзякуючы яго структуры і даступнасці выкладу матэрыялу, ён таксама можа быць карысны студэнтам іншых спецыяльнасцей, выкладчыкам устаноў вышэйшай адукацыі і сярэдніх спецыяльных навучальных устаноў, настаўнікам спецыялізаваных класаў сярэдніх агульнаадукацыйных школ, зацікаўленых у паглыбленым вывучэнні оптыкі.
