"Якасная адукацыя - моцная дзяржава"

З дакладам «Купалаўскі ўніверсітэт – тэрыторыя якасці» выступіла рэктар Ірына Кітурка.

– Новы навучальны год - гэта новыя надзеі, новыя планы, новыя чаканні, і сёння мы будзем казаць пра самае важнае для любой арганізацыі, для сям'і, для чалавека, для краіны, мы пагаворым аб якасці. Але спачатку я хачу, безумоўна, падзякаваць вам усім, купалаўцы, за поспехі і дасягненні мінулага навучальнага года. Ён быў вельмі значны для нас, – адзначыла Ірына Фёдараўна і пералічыла асноўныя падзеі 2024-2025 навучальнага года.

Сярод іх – актыўны ўдзел у выбарах Кіраўніка дзяржавы; 80-годдзе Вялікай Перамогі, якое на доўгія гады вызначыла вектар развіцця працэсу грамадзянска-патрыятычнага выхавання; 85-годдзе ўніверсітэта, а таксама адкрыццё цэнтра грамадзянска-патрыятычнага выхавання, новага корпуса фізіка-тэхнічнага факультэта; цэнтра рускай мовы і беларускай культуры ў Кітаі.

Як адзначыла Ірына Фёдараўна, якасць знаходзілася заўсёды ў аснове развіцця ўніверсітэта, які прайшоў шлях ад настаўніцкага інстытута з дзвюма спецыяльнасцямі да Купалаўскага ўніверсітэта, пяціразовага лаўрэата прэміі ўрада за дасягненне ў галіне якасці. Фармулёўка місіі, распрацоўка стратэгічнага плана развіцця паказваюць на тое, што ўніверсітэт заўсёды быў накіраваны на якаснае развіццё ўсіх сфер сваёй жыццядзейнасці. Рэктар звярнула ўвагу на адкрыццё новых спецыяльнасцей, на правядзенне ўнутранай ацэнкі якасці адукацыйных праграм і на тое, што Купалаўскі ўніверсітэт першы ў краіне стварыў комплексныя праграмы развіцця спецыяльнасцей.

Перасягнуць сябе

– Як развівацца далей, падказаў Кіраўнік нашай дзяржавы: "Мы павінны перасягнуць сябе", – падкрэсліла Ірына Фёдараўна. – Нашы намаганні павінны быць накіраваны на павышэнне якасці жыцця людзей і павышэнне канкурэнтаздольнасці адукацыі ўнутры краіны і на міжнароднай арэне.

Яна адзначыла ключавыя напрамкі работы, якія былі вызначаны на Нацыянальнай школе рэктараў.

Нагадаем, першая Нацыянальная школа рэктараў, у якой прыняла ўдзел Ірына Кітурка, стартавала 25 жніўня ў Мінску. Праект арганізаваны для кіраўнікоў устаноў вышэйшай адукацыі і прадугледжвае цыкл навучальных семінараў з прыцягненнем у якасці спікераў экспертаў і кіраўнікоў дзяржаўных органаў, вядучых арганізацый, прадстаўнікоў заказчыкаў кадраў і бізнес-супольнасці. У ліку прыярытэтных напрамкаў развіцця вышэйшай адукацыі вызначаны дзяржаўная маладзёжная палітыка, якасць адукацыі як аснова эканамічнага развіцця і нацыянальнага суверэнітэту, нацыянальнай бяспекі нашай краіны.

Рэктар адзначыла запатрабаванасць купалаўскай адукацыі, што паказаў ход прыёмнай кампаніі - 2025. Сёлета на першы курс залічана 2402 студэнты. Упершыню на 100 працэнтаў быў выкананы набор на платную форму навучання. Каля чвэрці першакурснікаў прыязджаюць з іншых рэгіёнаў рэспублікі.

– У гэтым годзе да нас паступілі «зорныя» дзеці. Больш за 600 чалавек з балам 300 і вышэй. У нас шмат медалістаў, 400 чалавек, якія паступілі без уступных іспытаў. І ад таго, як вы дасце ім крылы на першым курсе ўніверсітэта, залежыць іх далейшае навучанне і жыццё, – звярнулася рэктар да педагагічнай супольнасці ўніверсітэта.

За поспехам стаіць пастаянны пошук новых форм работы з абітурыентамі, сярод якіх - правядзенне першага ў Рэспубліцы Беларусь адкрытага бацькоўскага сходу, круглагадовых стрымаў у інстаграм, дзён адчыненых дзвярэй, рэалізацыя праекта "Стань інжынерам у ГРДУ".

– Наша эканоміка адчувае дэфіцыт інжынерных кадраў. І сёлета мы ўжо ўбачылі, як на інжынерныя спецыяльнасці, дзякуючы праведзенай шырокай інфармацыйнай рабоце, быў сфарміраваны дастаткова добры конкурс. Нам трэба далей працаваць з заказчыкамі кадраў, таму што запатрабаванасць выпускніка - гэта адзін з галоўных крытэрыяў якасці працы любога ўніверсітэта, – падкрэсліла рэктар.

Задачы ў павышэнні якасці адукацыі

Гаворачы аб задачах на 2025-2026 навучальны год, Ірына Кітурка адзначыла павелічэнне долі бюджэтных месц у структуры набору, адкрыццё падрыхтоўкі па перспектыўных спецыяльнасцях, стварэнне ўніверсітэцкага цэнтра кампетэнцыі па інфармацыйнай бяспецы, неабходнасць актыўнага ўкаранення штучнага інтэлекту ў адукацыйны працэс і, вядома ж, выхаванне падрастаючага пакалення:

– Якасны выпускнік, якасны прафесіянал, якасны спецыяліст – гэта той, хто любіць сваю краіну і гатовы працаваць на яе карысць. Выхаваць патрыёта можа толькі патрыёт асабістым прыкладам і асабістым удзелам у мерапрыемствах. А асабісты ўдзел – гэта частка карпаратыўнай культуры нашага ўніверсітэта і тое, праз што ажыццяўляецца сувязь пакаленняў.

Працягнулася пасяджэнне традыцыйным ушанаваннем супрацоўнікаў універсітэта, якія дасягнулі высокіх вынікаў у працы, і маладых спецыялістаў, якія толькі распачалі свой прафесійны шлях.