У чэмпіянаце прынялі ўдзел каманды з Гродзенскага дзяржаўнага ўніверсітэта імя Янкі Купалы, Беларускага дзяржаўнага ўніверсітэта, Беларускага дзяржаўнага ўніверсітэта інфарматыкі і радыёэлектронікі, Беларускага нацыянальнага тэхнічнага ўніверсітэта, Беларускай дзяржаўнай акадэміі авіяцыі, Беларускага дзяржаўнага ўніверсітэта транспарту і Беларускага дзяржаўнага медыцынскага ўніверсітэта.

На працягу трох дзён удзельнікі змагаліся за лідарства, спаборнічаючы адзін з адным. Імкненне да перамогі, а галоўнае - згуртаванасць і фізічная падрыхтоўка каманд дазволілі суддзям вызначыць лепшых з лепшых.

Па выніках барацьбы месцы размеркаваліся наступным чынам: трэцяе месца заняла каманда Беларускага нацыянальнага тэхнічнага ўніверсітэта, другое месца - у каманды Беларускага дзяржаўнага ўніверсітэта. Абсалютным пераможцам спаборніцтваў стала каманда Гродзенскага дзяржаўнага ўніверсітэта імя Янкі Купалы.

- Было цяжка, але мы ўсе вельмі стараліся. Старанна трэніраваліся, навострывалі сваё майстэрства і навыкі гульні. Вельмі рады нашаму выніку, - падзяліўся эмоцыямі курсант ваеннага факультэта Купалаўскага ўніверсітэта Захар Юшкевіч.

Нагадаем, што па выніках чэмпіянату будуць адабраны лепшыя ігракі і сфарміравана зборная каманда ваенных факультэтаў універсітэтаў і інстытута, якая прыме ўдзел у Чэмпіянаце Узброеных Сіл Рэспублікі Беларусь.