Студэнты і выкладчыкі ГрДУ імя Янкі Купалы прынялі актыўны ўдзел у VIII рэспубліканскіх лёгкаатлетычных спаборніцтвах «Гарадзенская вандроўка», якія прайшлі ў Гродне. Для аматараў лёгкай атлетыкі былі падрыхтаваны ўнікальныя маршруты па цэнтральных вуліцах горада. У гэтым годзе на забегі падалі заяўкі амаль паўтары тысячы ўдзельнікаў з Беларусі, Расіі, Грузіі, Егіпта, Канады, Латвіі, Кітая і Узбекістана.
Спаборніцтвы праводзяцца штогод і накіраваны на прасоўванне спорту і здаровага ладу жыцця. Дарослыя спаборнічалі на дыстанцыях 5 і 10 кіламетраў, а для юных спартсменаў былі арганізаваны забегі на 60, 100, 200 і 400 метраў ва ўзроставых катэгорыях ад 3 да 12 гадоў.
Сярод удзельнікаў былі студэнты факультэта фізічнай культуры і курсанты вайсковага факультэта. Асаблівы прыклад спартыўнага энтузіязму паказаў дэкан факультэта фізічнай культуры Віталь Храмаў, пераадолеўшы дыстанцыі 10 і 5 км. Яркім момантам спаборніцтваў стала перамога студэнта 4 курса факультэта фізічнай культуры Арцёма Чамбровіча, які стаў абсалютным лідэрам на дыстанцыі 5 км.
Курсант ваеннага факультэта Аляксандра Сафонава падзялілася сваімі эмоцыямі.
– У цэлым, вынікам задаволеная. У параўнанні з мінулымі забегамі спякотнае надвор'е ўнесла свае карэктывы, але дыстанцыя аказалася цалкам лёгкай, – расказала Аляксандра.
Удзел купалаўцаў не абмежаваўся толькі спартыўнымі дасягненнямі. Студэнты факультэта фізічнай культуры, факультэта біялогіі і экалогіі, а таксама педагагічнага факультэта актыўна ўдзельнічалі ў арганізацыі мерапрыемства, забяспечваючы яго паспяховае правядзенне. Акрамя таго, у групе падтрымкі падчас забегу адзначыліся студэнты факультэта гісторыі, камунікацыі і турызму, юрыдычнага факультэта і факультэта матэматыкі і інфарматыкі. Іх падтрымка стварыла атмасферу адзінства для ўсіх удзельнікаў спаборніцтваў.
Удзел прадстаўнікоў ГрДУ імя Янкі Купалы ў такіх мерапрыемствах падкрэслівае актыўную пазіцыю ўніверсітэцкай моладзі і выкладчыцкага складу ў імкненні да здаровага ладу жыцця і ўцягнутасці ў спартыўнае жыццё горада.
Гродзенскі дзяржаўны ўніверсітэт імя Янкі Купалы