Сёння, 17 лютага, пад кіраўніцтвам старшыні Камітэта дзяржаўнага кантролю Гродзенскай вобласці Анатоля Дарожкі адбылося пасяджэнне рабочай групы па кантролі за правядзеннем заключнага этапа ўніверсітэцкіх алімпіяд.
Мэта сустрэчы - неабходнасць ацэнкі гатоўнасці вышэйшых навучальных устаноў краіны да правядзення алімпіяд, бо фінальныя іспыты для школьнікаў Гродзенскай вобласці пройдуць у трох універсітэтах: ГрДУ імя Янкі Купалы, ГрДМУ і ГДАУ.
Удзельнікамі пасяджэння сталі намеснік старшыні Гродзенскага аблвыканкама Віктар Пранюк, начальнік галоўнага ўпраўлення адукацыі аблвыканкама Руслан Абрамчык, рэктар Гродзенскага дзяржаўнага ўніверсітэта імя Янкі Купалы Ірына Кітурка, рэктар Гродзенскага дзяржаўнага медыцынскага ўніверсітэта Ігар Жук і рэктар Гродзенскага дзяржаўнага аграрнага ўніверсітэта Валянцін Пяшко.
Анатоль Дарожка адзначыў, што алімпіяды - гэта добрая магчымасць выявіць самых таленавітых і перспектыўных рабят, а таксама падтрымаць іх імкненне да ведаў. Перамога ва ўніверсітэцкай алімпіядзе дае абітурыенту права на залічэнне ў ВНУ без уступных іспытаў, таму яе правядзенне павінна быць арганізавана ў адпаведнасці з заканадаўствам.
На сустрэчы абмеркавалі змяненне парадку атрымання і адкрыцця экзаменацыйных заданняў, якое стане дадатковай мерай бяспекі. Доступ да экзаменацыйных заданняў будзе адкрыты па кодзе, які прыйдзе на мабільны тэлефон кіраўнікам рабочых груп, у склад якіх будуць уключаны выключна супрацоўнікі Камітэта дзяржаўнага кантролю Гродзенскай вобласці. Гэта дазволіць пазбегнуць спробаў дачаснага адкрыцця пакетаў з заданнямі і несанкцыянаванага выкарыстання матэрыялаў.
Гродзенскі дзяржаўны ўніверсітэт імя Янкі Купалы