4-5 чэрвеня ў Екацярынбургу ў дзевятнаццаты раз прайшоў Еўрапейска-Азіяцкі прававы кангрэс, які сабраў вучоных і практыкаў з краін ЕАЭС і ШАС. Агульнай тэмай усіх пляцовак кангрэса стаў «Сінтэз права і тэхналогій: на шляху да тэхналагічнага лідэрства». Актыўнымі ўдзельнікамі сустрэчы сталі прадстаўнікі юрыдычнага факультэта Купалаўскага ўніверсітэта.
Галоўнай задачай кангрэса стала забеспячэнне адкрытага абмену думкамі па актуальных праблемах, якія хвалююць юрыдычную супольнасць, прадстаўнікоў органаў дзяржаўнай улады і бізнесу.
Ад юрыдычнага факультэта Гродзенскага дзяржаўнага ўніверсітэта імя Янкі Купалы ў мерапрыемствах кангрэса прынялі ўдзел дэкан юрыдычнага факультэта Святлана Чабуранава, загадчык кафедры грамадзянскага права і працэсу Ігар Мартыненка і дацэнт кафедры грамадзянскага права і працэсу Ірэна Кірвель.
Святлана Чабуранава прыняла ўдзел у агульным сходзе ўдзельнікаў і партнёраў Кансорцыума «Еўрапейска-Азіяцкі прававы універсітэт». На секцыі юрыдычнага адукацыйнага форуму Святлана Ягораўна разам з калегамі з іншых краін абмеркавала мэты, мадэлі развіцця і перспектывы юрыдычнай адукацыі.
Ігар Эдуардавіч выступіў спікерам круглага стала «Палітыка памяці як міждысцыплінарны інструмент сацыяльных тэхналогій у юрыдычнай навуцы і адукацыі: гісторыя і сучаснасць». Ён прадставіў прысутным пленарны даклад «Абарона гістарычнай памяці і праўды, пераасэнсаванне канцэпцыі культурнага генацыду, забеспячэнне адказнасці за яго ўчыненне». Таксама ў рамках юрыдычнага адукацыйнага форуму Ігар Эдуардавіч прыняў удзел у абмеркаванні праблем навуковай магістратуры і атэстацыі кадраў вышэйшай навуковай кваліфікацыі, падзяліўся беларускім вопытам у гэтай сферы.
Ірэна Кірвель выступіла ў якасці спікера на экспертнай сесіі «Арбітраж у эпоху развіцця тэхналогій: новыя гарызонты і новыя выклікі» з дакладам аб інтэграцыі лічбавых тэхналогій у трацейскае (арбітражнае) разбіральніцтва. На круглым стале «Інфармацыйныя тэхналогіі ў натарыяльнай дзейнасці: рызыкі ці бяспека?», арганізаваным Натарыяльнай палатай Свярдлоўскай вобласці, Ірэна Юзэфаўна асвяціла пытанні трансфармацыі натарыяльнай працэдуры ў лічбавую эпоху.
Еўрапейска-Азіяцкі прававы кангрэс стаў для прадстаўнікоў Купалаўскага ўніверсітэта прафесійнай пляцоўкай, дзе яны змаглі абмяняцца думкамі па найбольш актуальных пытаннях юрыдычнай сферы, запазычыць новыя ідэі, а таксама ўстанавіць дзелавыя і сяброўскія кантакты.
Гродзенскі дзяржаўны ўніверсітэт імя Янкі Купалы