На базе навучальнага корпуса ГрДУ імя Янкі Купалы па вуліцы Даватара адбылося выязное судовае пасяджэнне суда Кастрычніцкага раёна горада Гродна, дзе прысутнічалі замежныя студэнты юрыдычнага факультэта і навучэнцы прававога класа сярэдняй школы № 28 імя В.Д. Сакалоўскага горада Гродна.
У ГрДУ імя Янкі Купалы актыўна развіваецца практыка-арыентаваная адукацыя, якая з'яўляецца адным з ключавых прынцыпаў навучання. Універсітэт імкнецца даць студэнтам не толькі тэарэтычныя веды, але і практычныя навыкі, неабходныя для пабудовы кар'еры і прафесійнага развіцця. Для паспяховай адукацыі вельмі важная інтэграцыя акадэмічных ведаў з рэальным досведам працы. Таму ва ўніверсітэцкае асяроддзе актыўна прыцягваюцца спецыялісты-практыкі, а на базе юрыдычнага факультэта функцыянуе зала судовых пасяджэнняў, куды нярэдка запрашаюцца студэнты, а таксама абітурыенты. Моладзь можа на свае вочы ўбачыць працу суддзяў, пракурораў і адвакатаў, лепш зразумець іх прафесіі.
На пасяджэнні суд разгледзеў крымінальную справу па абвінавачанні 39-гадовай грамадзянкі Рэспублікі Беларусь у здзяйсненні злачынства, прадугледжанага ч. 1 арт. 328 Крымінальнага кодэкса Рэспублікі Беларусь "Незаконны абарот наркатычных сродкаў, псіхатропных рэчываў, іх прэкурсораў і аналагаў". Судовае пасяджэнне прайшло пад старшынствам суддзі Уладзіміра Пазняка.
Памочнік пракурора горада Гродна, юрыст 2 класа Андрэй Шчарбак, які выступаў у якасці дзяржаўнага абвінаваўцы, растлумачыў:
- Суд пагадзіўся з пазіцыяй дзяржаўнага абвінаваўцы аб даказанасці віны абвінавачанай па прад'яўленым ёй абвінавачанні і прызначыў пакаранне ў выглядзе пазбаўлення волі на тэрмін два гады з адбываннем пакарання ў папраўчай калоніі ва ўмовах агульнага рэжыму. Пры прызначэнні пакарання таксама ўлічана, што абвінавачаная судзімая 22 красавіка 2022 года судом Кастрычніцкага раёна горада Гродна за здзяйсненне аналагічнага злачынства, пакаранне адбыла цалкам 19 лістапада 2024 г., аднак 27 лістапада 2024 г. зноў здзейсніла злачынства ў перыяд нязнятай і непагашанай судзімасці, не працаўладкавана і мае патрэбу ў прымяненні прымусовых мер бяспекі і лячэння. Прыгавор у законную сілу не ўступіў і можа быць абскарджаны ў апеляцыйным парадку.
Практыка-арыентаваная адукацыя ў Гродзенскім дзяржаўным універсітэце імя Янкі Купалы садзейнічае фарміраванню гатоўнасці студэнтаў да рэальных прафесійных задач, развіццю аналітычнага мыслення, камунікатыўных навыкаў і здольнасцей да вырашэння складаных задач. Такі падыход дапаможа выпускнікам паспяхова рэалізоўваць сябе ў выбранай сферы дзейнасці і дасягаць высокіх вынікаў.
ДАВЕДКА: санкцыя ч. 1 арт. 328 Крымінальнага кодэкса Рэспублікі Беларусь "Незаконны абарот наркатычных сродкаў, псіхатропных рэчываў, іх прэкурсораў і аналагаў" прадугледжвае пакаранне ў выглядзе абмежавання волі на тэрмін да пяці гадоў або пазбаўлення волі на тэрмін ад двух да пяці гадоў.
Гродзенскі дзяржаўны ўніверсітэт імя Янкі Купалы