У Купалаўскім універсітэце завяршыўся адукацыйны курс для магістрантаў з Кітайскай Народнай Рэспублікі. Гэты праект быў рэалізаваны дзякуючы ініцыятыве старшых выкладчыкаў кафедры тэорыі фізічнай культуры і спартыўнай медыцыны Ірыны Тонкаблатавай і Аляксея Абялеўскага.
Курс «Тэорыя і методыка фізічнага выхавання і спартыўнай трэніроўкі» быў распрацаваны з улікам сучасных тэндэнцый у галіне фізічнай культуры і спорту. Праграма ўключала як тэарэтычныя лекцыі, так і практычныя заняткі, што дазволіла ўдзельнікам не толькі вывучыць ключавыя аспекты методыкі трэніроўкі, але і прымяніць атрыманыя веды на практыцы.
Спорт – універсальная мова, якая аб'ядноўвае людзей розных культур і нацыянальнасцяў, спрыяючы ўзаемаразуменню і сяброўству. Адукацыйны курс паглыбіў веды магістрантаў і падкрэсліў значнасць фізічнай культуры і спорту.
Дэкан факультэта фізічнай культуры Віталь Храмаў адзначыў значнасць такіх мерапрыемстваў. У завяршэнне курса Віталь Уладзіміравіч уручыў удзельнікам сертыфікаты, якія пацвярджаюць іх паспяховае праходжанне праграмы, што стала прыемным фінальным акордам адукацыйнага курса.
Удзельнікі праекта высока ацанілі якасць выкладання і арганізацыю, адзначыўшы, што атрыманыя веды дапамогуць ім у далейшым прафесійным росце. Гэтае мерапрыемства стала не толькі важнай часткай навучальнага працэсу, але і садзейнічала культурнаму абмену паміж Беларуссю і Кітаем.
Гродзенскі дзяржаўны ўніверсітэт імя Янкі Купалы